एमालेको बालुवाटार बैठकको निर्णयप्रति बामदेवको असन्तुष्टि

नेपाल समाचार

शेयर गर्नु होस ।

काठमाडौं । नेकपा एमालेका तत्कालीन उपाध्यक्ष वामदेव गौतमले १० औं महाधिवेशन आयोजक कमिटी बैठकले गरेका निर्णयप्रति असन्तुष्टि जनाएका छन् ।
दुई दिनसम्म चलेर शुक्रबार सकिएको १० औं महाधिवेशन आयोजक कमिटी बैठकले १९ सदस्यीय स्थायी कमिटी गठन गरेको थियो । जसमा गौतमलाई स्थायी कमिटीमा राखिएको छ भने अन्य जिम्मेवारी दिइएको छैन्।

गौतमले आफूलाई स्थायी कमिटीमा राखेको जानकारी नभएको भन्दै आफू महाधिवशेनबाट निर्वाचित आधिकारिक उपाध्यक्ष भएको बताएका छन्। ‘आज बनाएको स्थायी कमिटीबारे मलाई जानकारी छैन्,’ गौतमको भनाइ उद्धृत गर्दै उनका प्रेस संयोजक विश्वमणि सुवेदीले भने, ‘मसँग सल्लाह गरेर पनि बनाएको होइन । म महाधिवेशनबाट निर्वाचित उपाध्यक्ष हुँ । त्यसलै यो राख्ने, हटाउने भन्ने कुरा ठीक होइन् ।’

एमाले अध्यक्ष केपी शर्मा ओली र गौतमबीच विहीबार बालुवाटारमा डिनर बैठक वार्ता भएको थियो। उक्त वार्तामा ओलीले गौतमलाई आजको बैठकमा सहभागि हुन आग्रह गरेका थिए।

गौतमले फागुन २८ गतेको निर्णय फिर्ता लिन आफूले गरेको आग्रह अध्यक्ष ओलीले अश्वीकार गरेपछि बालुवाटारबाट हिँडेको बताएका थिए। उनी आजको बैठकमा सहभागि भएनन्।