कम्युनिस्टहरु सबैभन्दा धनी भए, सबैभन्दा बिलासी भए : मणि थापा

नेपाल समाचार

नेपाल कम्युनिस्ट पार्टीका स्थायी समिति सदस्य मणि थापाले कम्युनिस्ट सरकारले समाजवादी शिक्षाका लागि शिक्षकहरुलाई सहज रुपमा परिचालित गर्नुपर्ने बताएका छन्।

शनिबार शिक्षकहरुको बनभोज कार्यक्रममा बोल्दै नेता थापाले समाजको वस्तुगत अध्ययन बिना शिक्षाको समाजवादी मोडालिटी तय गर्न नसकिने बताए। थापाले भने, ‘थुप्रै शिक्षकहरु प्रधानमन्त्री भएका छन्, मन्त्री भएका छन्। तर, शिक्षकहरुका समस्या समाधान भएका छैनन्। तसर्थ हामीले भावनामा बगेर होइन, वस्तुगत धरातलमा उभिएर समस्या समाधान गर्नुपर्छ।’

‘हामी केन्द्रीय समितिको बैठकमा छौं’ थापाले भने, ‘कम्युनिष्ट पार्टीका नेताहरु सबैभन्दा धनी छन्, सबैभन्दा बिलासी छन्। यसको जवाफ हामीले खोज्नुपर्छ। जबसम्म पार्टीभित्रै वर्गीय खाडल गहिरिँदै जान्छ, तबसम्म राजनीतिक विद्रोह पार्टीभित्र र बाहिर पनि जारी रहन्छ। हामी त्यही वर्गसंघर्षमा छौं। हामीले सही संस्कार र प्रणालीका लागि भित्र पनि बाहिर पनि लड्नुपर्छ।’

नेता थापाले नेपाली राजनीतिमा ठूलो विकृति भित्रिएको बताए। उनले भने, ‘एउटा शिक्षकले ३० वर्ष पढाउँछ। तर, रित्तो हात घर फर्कन्छ। तर, एउटा कार्यकर्ताले पाँच वर्ष राजनीति गर्दा करोडौं कमाउँछ। हाम्रो समस्या यहाँनिर छ। राजनीतिमा आज जुन आकर्षण छ, त्यो निष्ठाको आकर्षण होइन, साधन स्रोत हडप्ने आकर्षण हो। यसले विचलनमा लैजान्छ।’

‘शिक्षकहरु उपयोगका साधन होइनन्। नेपालको शैक्षिक आन्दोलन सकिएको छैन’ नेता थापाले भने, ‘शिक्षकहरुको जागरण बिना समाजवादी शिक्षा प्रणाली स्थापित गर्न सकिँदैन। त्यसका लागि शिक्षकहरुको राजनीतिक जागरण र आन्दोलन जरुरी छ। त्यसैले कम्युनिस्ट पार्टीले शिक्षकहरुलाई राजनीति बाहिर राख्न सक्दैन।’