कवि बसन्त चाैधरीकाे विश्व–काव्ययात्रा क्यानडाको टोरन्टोमा ।

Events

कवि वसन्त चौधरीले आफ्नो विश्व–काव्ययात्राको दोस्रो चरण आरम्भ गर्ने भएका छन्। आफ्ना एकल कवितावाचनका माध्यमले प्रवासमा बस्ने नेपालीमाझ पुगेर उनीहरूबीच नेपाली भाषा, साहित्य र संस्कृतिको प्रचार गर्र्दै नयाँ पुस्तामा यी फाँटहरूप्रति अभिरुचिसँगसँगै जागरण समेत सञ्चार गर्ने उद्देश्यले सन् २०१२ मा अमेरिकाको न्युयोर्क सहरबाट आफ्नो विश्व–काव्ययात्राको थालनी गरेका थिए कवि चौधरीले।

यस क्रममा अमेरिकाकै विभिन्न ६ वटा सहरमा सात पटक, बेलायत, दुबई, भारतको सिक्किम, हङकङ, सिंगापुर, जापानको टोकियो, अस्ट्रेलियाको सिड्नी र मेलबर्नमा एक–एक पटक गरी उनको यस विश्व काव्ययात्राका १७औं शृंखला सम्पन्न भइसकेका छन्। यसबाहेक देशभित्र पनि उनले काठमाडौं, पोखरा र रूपन्देहीलगायत सहरका विभिन्न ठाउँमा एकल कवितावाचन गरिसकेका छन्। यो उनको पहिलो चरणको विश्व–काव्ययात्रा थियो।

बीचमा आफ्नो कार्यव्यस्तताका कारण केही समय उनको विश्व–काव्ययात्राको कार्यक्रम रोकिएको थियो। तर उनको विश्व–काव्ययात्राप्रति असीम अभिरुचि राख्दै विदेशमा विभिन्न मुलुकहरूबाट विशेष अनुरोध आएकाले उनले यस वर्षबाट फेरि दोस्रो चरणको आफ्नो विश्व–काव्ययात्राको थालनी गर्ने भएका छन्।

यसअन्तर्गत ८ सेप्टेम्बर २०१९ का दिन उनको यस चरणको काव्ययात्राको आरम्भ क्यानडाको टोरन्टो सरहबाट हुँदैछ। यो उनको १८औं शृंखलाको आयोजना त्यहाँस्थित नेपाली साहित्य समाज, क्यानडाले गर्दैछ। यसको लगत्तै अन्तर्राष्ट्रिय नेपाली समाज (अनेसास), न्युयोर्क च्याप्टरले १९औं शृंखला अमेरिकाको न्युयोर्कमा ११ सेप्टेम्बरमा २०१९ र २०औं शृंखलाको भर्जिनियाको अन्तर्राष्ट्रिय कलाकार–मञ्च अमेरिकाले भर्जिनिया सहरमा १५ सेप्टेम्बर २०१९ मा भव्यरूपमा आयोजना गर्दैछ।

यी तीनै स्थानमा चौधरीका नेपाली, अंग्रेजी, नेपालभाषा, तामाङ, भोजपुरी, मैथिली, हिन्दी, बंगाली र मारवाडी गरी नौ भाषामा अनुदित ‘वसन्त’ काव्यसंग्रहको पनि लोकार्पण गरिने छ।

उद्योग–व्यापारको व्यस्तताबाट समेत समय निकालेर नेपाली भाषा–साहित्यको समुत्थानमा संस्थागत तथा व्यक्तिगतरूपमा निरन्तर लागिरहेका व्यक्तित्व हुन् कवि वसन्त चौधरी। उनी भन्छन्, ‘व्यापार मेरो कर्म हो भने सिर्जना मेरो धर्म हो।’ त्यसैले उनी विश्वस्त छन्, उनको विश्व–काव्ययात्राको यो दोस्रो इनिङ्ले नेपाली साहित्यको बगैंचालाई मलजल गर्दै सुवासित फूलहरू फक्र्याउने काम गर्नेछ।

समाचार साभारः अन्नपूर्ण पोष्ट