डव्लुएचओमा जागिर गर्न गएकी स्वास्थ्य सचिव चौधरीलाई कारबाही गर्ने तयारी

नेपाल समाचार

स्वास्थ्य तथा जनसंख्यामन्त्री भानुभक्त ढकालले स्वास्थ्य सचिव डा. पुष्पा चौधरीलाई कारबाही गर्ने तयारी गरेका छन् । नेपाल सरकारको सचिव रहेपनि विश्व स्वास्थ्य संगठन (डव्लुएचओं)को भारतस्थित नयाँदिल्ली कार्यालयमा जागिर खाइरहेकी उनलाई कारबाही गर्न निर्देशन दिइसकेको मन्त्रालय श्रोतले बताएको छ । सरकारको सचिवले दुई तिर जागिर खाएको विषयमा सरकारले गम्भीरता पूर्वक लिँदै विभागिय कारबाही गर्ने तयारी थालेको हो । विभागिय कारबाही गरे उनले निवृत्तिभरण (पेन्सन) पाउने छैनन् ।

सचिव डा. चौधरीले दिएको राजीनामा अझै स्वीकृत भएको छैन । यसअघि नै सरकारले चौधरीलाई राजीनामा स्वीकृत नगर्ने भनेर जबाफ दिइसकेको भनेपछि चौधरी अटेर गर्दै जागिर खाइरहेका छन् । यस मानेमा उनले सरकारको नियम उल्लंघन गरेकी छन् ।

चौधरी कानुनतः अझै नेपाल सरकारका सचिव हुन् । स्वास्थ्य मन्त्रालयले उनको नाम अझै हटाएको छैन । स्वास्थ्य मन्त्रालयको बेबसाइटमा उनको तस्वीर सचिवका रुपमा राखिएको छ । तर उनी दिल्लीस्थित डब्लुएचओको पी ५ (सहसचिव) स्तरको जागिर खाइरहेकी छन् ।

नेपाल सरकारको सचिव भएपनि उनी सुविधाका लागि सहसचिवस्तरको जागिरमा रमाइरहेकी छन् । डब्लुएचओमा नाम निस्किएको केही समयपछि २०७६ कात्तिक १३ बाट लागू हुने गरी उनले राजीनामा दिएकी थिइन् । तर उनको राजीनामा सरकारले अस्वीकृत ग¥यो । उनले पुनः राजीनामा स्कीकृतीका लागि मंसिरको तेस्रो साता निवेदन दिएपनि त्यो हुन सकेन । राजीनामा स्वीकृत गर्नुको सट्टा विभागीय कारबाहीको तयारी थालिएको मन्त्रालय श्रोतले बताएको छ । सचिव चौधरीले २०७६ कात्तिक १७ देखि डब्लुएचओको जागिर खाइरहेकी छन् ।